वनविज्ञानमा मनोविज्ञान

एउटै क्याम्पसमा २ वटा विश्वविद्यालय अटाएको छ हेटौँडास्थित वनविज्ञान अध्ययन संस्थानमा । त्रिभुवन विश्वविद्यालयले सञ्चालन गरेको वनविज्ञान अध्ययन संस्थानमा सरकारले गठन गरेको नयाँ विश्वविद्यालय कृषि तथा वनविज्ञान विश्वविद्यालय दुबैले वनविज्ञानलाई काखी च्यापिरहेका छन् । वर्षौंदेखि वनविज्ञान कार्यक्रम चलाउँदै आएको त्रिविले आफ्नो सम्पत्ति गुम्ने चिन्ताले नयाँ विश्वविद्यालयलाई स्वामित्व हस्तान्तरण गर्न सकेको छैन ।
दुबैले हेटौँडाको क्याम्पसमा आँखा खाडेपछि आआफ्नो स्वामित्वमा ल्याउन हरसम्मव प्रयास गरिरहेको छन् । नयाँ विश्वविद्यालय ऐनले नै २ वटा क्याम्पस गाभिसिएपछि स्वतः आफ्नो भएको नयाँको तर्क छ । आफ्नो सम्पत्ति बिनासहमति अरुलाई हस्तान्तरण गर्न नसकिने त्रिविको भनाइ छ । उसले त आफ्नो त्रिविसभाको बहुमतले नै नढिने निर्णय गरेकाले दिन नसक्नेसम्म बताउँदै आएको छ । ऐन लागू हुनासाथ कार्यन्वयन हुनुपर्ने कृषिवनको तर्क र आफ्नो सम्पत्ति नदिने त्रिविको अडानले एउटै क्याम्पसमा २ वटाको एकोहोरी, दोहोरी र तेहरी समेत चल्ने गरेको छ । कतिपय अवस्थामा मुठभेड होलाहोला झैँ समेत हुने गरेको छ । दोहोरो प्रशासन, दोहोरो भर्ना, प्राध्यापक विद्यार्थी फरकफरक । एकै क्याम्पसमा २ वटा साइनवोर्डले आममानिसलाई नै अल्मल्याई राखेको छ । आपसी विवाद र मतभेद सहतहमै आउने गरेको छ । त्यसमाथि अन्य सरोकारवालाले आगोमा घ्यू थप्ने काम पनि गरिरहेका छन् । त्रिविले यसवर्षदेखि वीएस्सीमा भर्ना नलिने पूर्वसहमति तोडेपछि त झन विवाद चर्केको हो । मकवानपुर राजनीतिक दलसमेत त्रिविलाई नै साथ दिएका छन्, यसले त्रिविलाई अझै उचाल्लिन बल पुगेको छ ।
पछिल्लोपटक त्रिवि प्राधयापक संघले अघि सारेको प्रस्ताव सकारात्मक छ । दुबै आवश्यक रहेको ठहर गर्दै वनविज्ञान सँगैको नेपाल ट्रष्टको जग्गामा नयाँ विश्वविद्यालय अन्गर्ततको क्याम्पस सार्ने सके राम्रो हुने उसको सुझाव छ । यसले द्वन्द्व पनि घट्ने र जिल्लावासीलाई पनि फाइदा पुग्ने प्राध्यापक संघको प्रस्ताव सकारात्मक नै मान्नुपर्छ । सरकारले विषयगत विशिष्टीकरणका लागि विश्वविद्यालय थपेको हो, त्यसैले क्याम्पस गाभेको हो । स्वामित्वका लडाईँ भनिए पनि दुबैको अस्तित्वको लडाईँ भएकाले तत्काल दुबैपक्ष राखेर निर्णय लिनु आवश्यक छ, नत्र विद्यार्थीको भविष्य अन्यौल हुन सक्छ ।