बर्डफ्लुको असर

पहिलोपटक हेटौँडामा बर्डफ्लुको संक्रमण देखा परेपछि कुखुरा पालक किसान, बेचविखनमा संलग्न व्यवसायी र उपभोक्ता मारमा परेका छन् । किसानले पालनका लागि गरेको लगानी, बैँङ्कको ऋण तथा निर्माण गरिएका संरचनाको खर्चसम्म उठाउन नसकेर मारमा परेका छन् । कुखुरा बिक्री गर्ने र मासु पसल सञ्चालन गर्ने व्यवसायीले सो पेसा नै परिवर्तन गर्नुपर्ने भएको छ । होटलहरुले समेत कुखुराको मासु प्रयोग गर्न नसक्ने अवस्था आएको छ । कुखुराको मासुका पारखी उपभोक्ताले मासु खान नपाएको भात्र होइन खसीको तुलनामा सस्तो मासु प्राप्त गर्न सक्ने अवस्थाबाट बञ्चित भएका छन् । कुखुराजन्य उत्पादन मानिने दाना लगायतका आश्रित उद्योगहरु पनि नराम्ररी प्रभावित बनेको छ ।
मकवानपुरको हेटौँडास्थित कमाने र चौघडामा बर्डफ्लुको सङ्क्रमणमा देखा परेको हो । त्यसको आसपासका करिब ५ सय मिटर क्षेत्रलाई संकटग्रस्त क्षेत्र घोषणा गरी सर्न सक्ने भन्दै करिब साढे १० हजार कुखुरा नष्ट गरिएको छ । मानव स्वास्थ्यमा पनि असर गर्न सक्ने ठान्दै त्यसको पनि अध्ययन भएको छ । बर्डफ्लुबाट मकवानपुर करिब ५० करोड बराबरको लगानी जोखिममा परेको छ । सरकारले दिने भनिएको क्षतिको कुनै ग्यारेन्टी छैन । क्षतिपूर्ति पाए पनि किसानलाई सामान्य राहत मात्र हुनेछ ।
मकवानपुरसहित, काठमाडौँ, मक्तपुर, काभ्रे र सिन्धुपाल्चोकमा बर्डफ्युको संक्रमण देखिएको हो । मकवानपुरकै कमाले र चौघडा बाहेकका कुखुरा पनि अहिले निर्यात हुन छाडेको छ । केही समय अघि सर्लाही पुगेको कुखुरा मकवानपुरको नाम सुन्नासाथ फिर्ता पठाइदिएको घटनाबाट पनि तत्काल यो व्यवसायको पुनस्र्थापन सम्भव देखिएको छैन । व्यावसायिक मारसँगै आगामी दिनमा बर्डफ्यु नियन्त्रण गर्न र फैलन नदिन उत्तिकै सचेत हुनुपर्ने आवश्यकता छँदैछ । यसले उपभोक्ताप्रतिको जिम्मेवारी पनि प्रष्ट गर्न सक्छ ।