प्रकाशकीय

भूमध्येरेखा पृथ्वीको मध्यभागमा लमतन्न परेको काल्पनिक रेखा हो, जसले पूर्वपश्चिमबाट अक्षान्तर रेखाको समानान्तर हुने गरी पृथ्वीलाई पटुकाझैं फन्को मारेको हुन्छ । अन्डालाई चिरा पारिए झैँ सिङ्गो पृथ्वीलाई दुई वटा भागमा बाँडेर बसेको रेखाले कल्पनाशक्तिद्वारा आÇनो विभाजन लक्ष्य सादृश्य पार्दछ । भूगोलको विद्यार्थी तथा भौगोलिक अध्येताले प्रष्ट चिन्दछन् भूमध्यरेखालाई । उनीहरूले आदर्श पनि ठान्छन्, पृथ्वीलाई नै विभाजनको परिकल्पना साकार पार्न सक्ने, दीर्घकाल मस्तिष्कमा गडाउन सक्ने यो रेखा सर्वशक्तिमान् छ । त्यही भूमध्येरेखीय दृष्टिकोणलाई परिकल्पनाको प्राक्कथन मान्न सकिन्छ ।

सिङ्गो पृथ्वीलाई असल र खराबको आधारमा विभाजन गरेर दुई चिरा बनाइदिने ठान्दा आमसञ्चारमा यसको अर्थ पनि विशेष लाग्न पुग्छ । विश्व नै भूमण्डलीकरणले एकै भएको बेला काल्पनिक रेखाहरूद्वारा विभाजित समाजमा एकताको भाव लहरहरू पनि पैदा हुन थालेका छन् । रेखैरेखाले बाँधिएकालाई भूमध्यरेखाको शक्ति, धीरता, शालीन र अविचलन देख्दा कस्तो लाग्ला ? आग्रह र पूर्वाग्रहभन्दा माथि हुन्छ पत्रकारिता । कुनै विचार, वाद वा आग्रहमाथि उठेर नागरिकका आधारभूत आवश्यकता र मान्यतालाई टेको दिन, थप योगदान पु¥याउन र बदलिंँदै गरेको समाजको गतिलाई द्रुततर पार्न सघाउने हाम्रो लक्ष्य हो । कसैलाई कुनै पनि आधारमा विभेद नगर्ने भूमध्यरेखीय सारतŒव पत्रकारिता बन्नैपर्छ । दैनन्दिन पत्रकारितामा घटना, सवाल वा अघटनाहरूको सूक्ष्म विश्लेषण सम्भव हुँदैन ।

अनौपचारिकभन्दा बढी औपचारिक, सवालभन्दा बढ्ता घटना, विश्लेषणभन्दा बढी संश्लेषणमा जोड दिँदा परम्पारगत धार छाड्न मुस्किल पनि हुन्छ । हतारमा तीव्र वेगवान् यात्रुलाई रोकिएर दायाँबायाँ हेर्ने फुर्सत पनि हुँदैन । हामी कुनै दलीय वा गैरदलीय विचारको समर्थक होइनौं न विरोधी । कुनै एक जात, भूगोल वा समाजको पक्षपाती पनि होइनौं । राम्रा गर्ने सबै हाम्रा हुन्, प्रोत्साहन जरुरी हुन्छ । जथाभावी गर्नेको स्वेच्छाचारिता सहने पनि हाम्रो धर्म किमार्थ होइन । थुप्रै मूलधारका साप्ताहिक, दैनिक र अनलाइन न्यूज पोट्रल पनि छन् । हामीलाई थाहा छ, सहज छैन, तर पृथक्, मौलिक र यथार्थ विश्लेषणसहितको पठनीय सामग्री जहिल्यै आवश्यक हुँदोरहेछ । यही यात्रामा सहकार्य गर्न उद्यत छौं । हामी  राजनीतिक वा  अराजनीतिक मिसनमा केन्द्रित छैनौँ । पत्रकारिताबाटै परिवर्तनको मार्ग पहिल्याउन सकिन्छ भन्ने भिजन र दृढ विश्वास छ हामीसँग, यसैको प्रयोग सुरुवाती अभियान हो । पत्रकारिता साँच्चिकै परोपकारी हुन्छ र हुनुपर्छ । व्यावसायिकता नै हाम्रो पनि मूलबाटो हो । यही बाटोबाट समाज रुपान्तरण सुदूर लक्ष्यप्राप्ति गर्न सकिन्छ । ससाना कुराहरू सँगेल्न सके ठूल्ठूला सपना र आश्वासनले गलेकाहरूलाई त्राण दिन सकिएला कि !

भाषणभन्दा बढी काम, स्वार्थभन्दा बढी सक्रियता, सपनाभन्दा बढी समर्पण पनि समाजमै सिञ्चिएका होलान्, तिनको आवाज बन्नु आजको आवश्यकता पनि हो । ठुल्ठुला ठानिने र मानिने मात्र सदैव सही हुँदैनन्, सवाल्र्टन नै हाम्रा यथार्थहरू हुन् । यही लक्ष्यमा पुग्नुछ । पत्रकारितालाई निष्पक्ष र निरपेक्ष बाटो मान्न सकिन्न बरु यो जनपक्षीय र यथार्थपरक हुनैपर्छ । भूमध्यरेखाबाट हेर्दा कहींकतै पक्षधरता नदेखियोस्, सचेत छौं । तर यतिले पुग्दैन । तपाईंंको सल्लाह, सुझाव र चाहना आजको सबैभन्दा ठूलो सत्यता हो, पाठक नै पत्रिकाको मार्गदर्शक हुन् । पाठकको साथ र सहयोगको सदा अपेक्षा हाम्रो रहनेछ ।